NOKKUÐ hefur borið á misvísandi upplýsingum í fjölmiðlum og víðar um að hvergi sé neitt í boði fyrir iðnlært fólk sem vill halda áfram námi og að það vanti sárlega fagháskóla. Þau rök eru notuð að við sameiningu Tækniháskóla Íslands og Háskólans í Reykjavík hafi námsmöguleikar iðnlærðs fólks horfið. Þetta er ekki rétt og er þessu greinarkorni ætlað að leiðrétta þennan misskilning og greina frá þeim möguleikum sem standa iðnlærðu fólki til boða í Háskólanum í Reykjavík. Það er mikið fagnaðarefni ef til stendur að fjölga leiðum fyrir iðnlært fólk og ekki er ætlunin að standa í vegi fyrir því, heldur einungis að vekja athygli á því námsframboði sem þegar er fyrir hendi.

Iðnlærðu fólki stendur eftirfarandi nám til boða við HR:

Nám á frumgreinasviði sem m.a. er markviss undirbúningur undir áframhaldandi nám í bygginga-, véla, rafmagnstæknifræði og þeim verkfræðigreinum sem eru í boði hjá skólanum ásamt tölvunarfræði. Ekki er gerð krafa um sveinspróf. Námið fer fram í dagskóla og er lánshæft hjá Lánasjóði íslenskra námsmanna. Þetta er markvisst nám raungreina og huggreina og í skýrslu sem er nýkomin út kemur í ljós að þessum nemendum vegnar mjög vel í námi í tæknifræði og verkfræði samanborið við nemendur með stúdentspróf úr framhaldsskólum.

Nám í bygginga-, véla- og rafiðnfræði

Skilyrði fyrir inngöngu er iðnmenntun að viðbættri einni önn á frumgreinasviði eða sambærilegur undirbúningur s.s. meistaranám. Um fjarnám er að ræða og tekur námið 3 ár samhliða vinnu en 1½ ár í fullu námi. Þetta er 45 eininga háskólanám sem lýkur með diplómaprófi og veitir tækifæri til aukinna starfsréttinda og starfa við eftirlits-, tækni- og hönnunarstörf.

Við þetta má bæta að nemendur með rafeindavirkjun og starfsreynslu uppfylla inngönguskilyrði í tölvunarfræði og 4. stigs vélstjórar ganga beint inn í það nám á háskólastigi sem hugur þeirra stendur til.

Hér hefur verið stiklað á stóru og ekki hægt að gera grein fyrir öllu í stuttri grein. Nemendur með iðnnám eru því hvattir til að kynna sér vel hvað fleira stendur þeim hugsanlega til boða í Háskólanum í Reykjavík.

JENS ARNLJÓTSSON,

lektor og verkefnisstjóri iðnfræðináms við Háskólann í Reykjavík.